QUE ANOS AQUELES...
SinopseMonólogo "Made in Galicia" no que nos embarcaremos nunha viaxe ao pasado para lembrar as desventuras dun galego calquera, unha especie de Balbino actualizado.
Xan Veiga tráenos á memoria un bo feixe de costumes, ditos, xogos, cantigas e outras lerias que nos farán matinar no moito que cambiaron as cousas dende aquela... do moito que cambiaron ou non.
O MAGO CARLOS
SinopseO Mago Carlos é un mago que sorprense pola súa empatía e sentido do humor. A interacción co público, un ilusionismo sen montaxes espectaculares e grandes doses de retranca son as súas cartas (máxicas) de presentación.
Un espectáculo de maxia e humor moi próximo que entretén e divirte a todos os públicos.
DJ RAFA
Rafa Aguiar é un coñecido locutor radiofónico e animador musical.Coa súa Discomóbil e unha selección de temas musicais moi variada, divertida e sorprendente, este pinchadiscos monfortino fai un percorrido moi especial por aqueles míticos 80-90.
Felipe Díaz 'CAXOTO'
Felipe Díaz, máis coñecido por "Caxoto", é narrador. Ligado ao espazo escénico dende hai anos, entra en contacto coa oralidade ao chegar á Editorial Kalandraka onde asumiu o reto de ser contador nunha campaña de animación á lectura que o levou por colexios de toda a xeografía galega.Dende aquela Caxoto percorre toda a xeografía galega, e parte do territorio 'alén do rego das patacas', cun amplo abano de espectáculos dirixidos, preferentemente a público infantil e familiar.
FILIPA COS CONTOS
SinopseEspectáculo “unipersoal”… ou non. Unha sesión “filipante” de contos para toda a familia.
Historias tradicionais, música e humor repártense entre os dous contadores que comparten escenario: o actor Fran Campos e a súa amiga Filipa que lle dará un valor engadido grazas á súa experiencia.
A narración oral é o fío condutor deste espectáculo para público familiar, que xunto coa teatralización e a música farán que "FILIPA COS CONTOS" se converta nunha actividade moi divertida, educativa e divulgativa.
A.M.E.N.
Sinopse“A.M.E.N.”: Accións Misioneiras Evanxélicas Nocturnas.
O Padre Merino especializouse no pecado debido á súa difícil infancia e complicada xuventude.
Falaranos, dende a súa experiencia, de pecados capitais como a luxuria, a pereza, a gula... utilizará para as súas ensinanzas a Palabra, as Sagradas Escrituras, xogos didácticos, maxia educativa, música, cancións en directo coa súa nova guitarra.